إليكَ.. وإلا لا تُشَدُّ الركائبُ..

إليكَ.. وإلا لا تُشَدُّ الركائبُ..

الاثنين، 30 يناير 2017

أيا وجودي..


أيا وجودي.. 

أيا وجودي وجد من مات غاليه
ولا به شريدة من عمام وخوالي

تقاطعت صكات بقعا علابيه
وضجّت خلوج الفقد ماضٍ وتالي

حزنٍ يحدّر به وهمٍّ يصاليه
فقرٍ وحربٍ والجنايز تشالي

عليك يا وقتٍ صفى من بلاويه
لا بِه قطيعة بَيْن ولا به ضلالي

ما هو بمثل اليوم شِقّت سماريه
وامسى صغير الناس واف السبالي

وقت ظهر به خارجي مع مخازيه
يبغى جهاده مير يا همّلالي 

هذا يكفُّر من يعيّي يجاريه
وهذا بسيفه يذبح أمٍّ وخالي

عزّاه يا شيب الهَدَب من تواليه
عزاه يا صدرٍ به الغمّ طالي

يا صْبَي عيني خذ من العلم صافيه
واترك مذاهيب البشر والجدالي

احفظ نبا جَدّك عن ادنى مشاريه
واكرم نما وجهك لعز الجلالي

من لا حفظ في بيض الايام واليه
بتبكي عيونه دمّ سود الليالي

ومن لا زرع في طينة العمر حاليه
تحصد يمينه حنظل في التوالي

ومن لا شرح صدره بذكرٍ يواليه
يسكن جبال الهم عقب السهالي

ومن لا دمح زلات ربعه تلاقيه
مثل الوَحَش في البيد صيد التلالي

ومن لا رفع بنيان ربعه ذواريه
يلقى القطيعة والعنى والجفالي

قرايبك محزم رصاصٍ تناديه
اقدح سنا ضوّك بروس الجبالي

كلٍّ بيلبس ما يِفصَّل بَيَاديه
واعرف ترا النوماس صعب المنالي

خلك ذرا للملتجي من ضواريه
يسكن ويشبع مهتني في الظِّلالي

صبر الفتى في ساعة الكرب تاليه
عز الظفر مع طيب ذكرٍ يقالي

ومن لا حشم عن ماقف الشين طاريه
يمسى وعرضه للخلايق مفالي

ومن لا تبع في ساعة السِّلم هاديه
يلقى الخَوَر بالقلب وقت النزالي

لا لا يلوم الناس وقت المشاريه
منهو يكذّب قولته بالفعالي

جلّل خفوقك بالحيا والرجا فيه 
ونوّر طريقك بالهدى والعدالي 

ولا لوّثت غربان حسدٍ مساقيه
طهّر بخوف الرب نبع الزّلالي

في الآدمي علّة وطبٍّ يداويه
علّته ذنبه والفتى ما يبالي

يمشي بغفلة والمنايا تباريه
حاسب ضميرك كان تبغا العلالي

واما دوى سُقمه بوصف يراعيه
فاعلم تراها توبة ما تِزالي

من تاب للرحمن طَيَّب نواحيه
يهدم صروح ابليس لو هي جبالي

بعض البشر في مطعمه ما يباليه
هو من حرام الرزق والا حلالي

ناسٍ حسابه يوم تعرض بلاويه  
واعزتا له فيه واعزتا لي

رب العباد العدل ياويل عاصيه
يا ذا تجمّل دام للعمر تالي

اذكر منامك يوم تذري سوافيه
تحت النصايب في الخلا وانت بالي

اشكر فضل مولاك تَنمي حسانيه
واحفظ صلاتك قبل رمسك يهالي

أدّب لسانك واحرسه من بلاويه
وحقّق سمين الهرج دون الهزالي

ابسط يمينك بالسخا وانت ناسيه 
حذراك تترك للخلايق مجالي

قلايد المعروف ذخرٍ لقانيه
البِرّ دَينٍ والعطايا تكالي

عرّب خوال ابنك وعطّر مجانيه
خلك تنومَس فالعرب بالعيالي

وان كان ما تلقى عشير يكافيه
فامسك خفوقٍ بالعوض له مجالي

ومن لا رفع بالفعل من قدر غاليه
يصبح بيوم يبصر الحب زالي

ويا مغلي المقفي ترا الصدّ شاريه
عنه القدم سقها وِاذا القلب سالي

قُرب الرجا يِِسقم وبِعدِه يداويه
قانون حبٍّ فيه مرٍّ وحالي

عنك الهوى يا ناعس الطرف حاديه
ربٍّ وَعَدنا والقدر ما يطالي

كم مومنٍ يرحل وفي الصدر ما فيه
حقٍّ على الدنيا نكدها متوالي

والخاتمة لله حمدٍ نواليه
عليه حسبي دايمٍ واتكالي

 وصلاة ربي عِدّ رمل بواديه
وعداد ما نبت الوعَر والسهالي

وعداد ما سيق الوَدَق من مناشيه
وعداد ما دِعيَ الولي بابتهالي

على رسول وفّق الله مساعيه
في ملّةٍ كمْلت جلال وجمالي

هبايب النود العذيّة يمانِيه
واللال الاشهب من مطرها يسالي

إبراهيم الدميجي

ليست هناك تعليقات:

إرسال تعليق